Debei Dokoo Dou Enauto

Debei Dokoo. (Google Earth)

Yaba dimi make ani amodoo, Debei makiyoo dou enauto, ege dimi make ani yokodoo, Debei makiyoo dou enauto, kou makii kouko wadomakidoke tita makii. Epoudako Piyake dimi wouwe wakouwe, wakouwe yatoko yukudei dimima, amuyai dimima ewaida, wouwe yatoko, kemuge dimi aikoyakai, daana aikoyatoko, atai dimi wouwe wakouwee.

Kouda kodaa ani dakiitai, ani woodo ani yamodoo, uwo onee maiya; kemuge, amuyai, daana yukudei dimiidaa make miyogooda, kouyupidaako odeewoyaa dou enauto. Koudakodaako Debei onee woyaa maiya, Yamogoodoke tita makiyoo. Debeigee Debeimagaa komaiya yuweetaii deide, kouko Debei makiyoo.

Okogoo gakita Mee tumaa-tumaaiyanaa wiyaiya too makiyoo, kouko; (Demago, Waine-Pigome) totaida, (Wagomani, Badii-Waine) totaida, (Digibagata, Pigai-Pigome) totaida, (Widuwakia, Pigai-Dawapa) totaida, (Yinudoba, Bobii-Badii) totaida, (Nayauwo-Digikotu, Goo-Bobii) totaida. Tikai Nuh ya owaayago komaa wegiyakee, bugaiya-bugaiyato koukomaida kuduga wadouwee etita dani bukaa.

Dimi enatoo, mana enatoo, keitai enaimo, ekowai enaimo, Debei bageekaa umitou, tikai make koukodo wado maiya okaikou iyee koutoo, koukodo imototogo, kouko, Debei makiibouda kouya make, manawuu, keitaiwuu, ekowaiwuu, mutaetuwaiwuu, ipa akagaawuu, eiakagawuu, daana ibo akayaikiwuu.

Ani poto uwipa maiya, adaku taimako beuu makiyoo, apikopa kaana ibo eyaikeigai makiyoo, yamekopa kaana ibo eyaikeigai makiyoo, wadomakidoketita makiyoo. Debei makiyoo kouna enaa yagamo dani bukaa, ibo kayaikai wado-wado katai, Debei makiyo kouna akiito ibokaiyai, daana akiito muta katuai. (Kaapaimaiya kaga).

Ugatamee, Debei makiikou akiya ugai-ugayawii, Debei bagee nikomugayawii, koudakoda, uti, piya, ege-mogo, aagiyo-taagiyo, ugai-ugayawii, yai-yabai maiya amuyai dimidaiga wado makidaa-amomakidaa. Miyobeu, kaapaimaiya kaga, mutakatuwai maiya kaga. Inii mee tuma-tumaiya, kado buna bagee iyo pini bagee, Debei bagee, akeepato migaakobee katai, kouko utoma agiyo utoma akiyato ugayawita kouya. (Yewonoo).

Mee inookaako Debei dokoo kou ibo eyaiketeidaigako, menanigou daigakaana ibo eyaikeigai, uwayawegou daigakaana ibo eyaikeigai, daana meeka ebeidaiganaa ibo eyaiketeidakaako weganaa teigai. Aniya ugapa kouko ugaipiyautokaa ugapa, kouko Ugatameeya ekowaatita tiyakee daana keiteetita tiyakee, Meidaana-meidaana paiga niimiyawita kouya.

Aniya ugapa kouko, Debei makiyoo kou ani ibo eyaiketeidaiga ugapa, kouko, Meetuma-tumaiya; kado buna kado dege, iyo pini iyo woya bagee epa. Ugatameeya akiya maki bobouto-bobouto niyamakiyake daana niyaugayawitita kouya. Ugatamee muta etuwateidaiga ugapa. Kou Debei dokoo maida make ugapa doba kouyako, inooko epiuga, daana inooko ewouga koyoka, ipa nayaikai. Ugatamee mobubokouto niyaduwayawitagi. Ugatamee eka dubaiga koyaoo.

 

Penulis: Admin Kaganepai (Bahasa Suku Mee) Catatan Harian.